သမိုင်းကို သွေးနဲ့ရေး
အသက်တွေ စတေးခဲ့ပေမယ့်
မသေ သေးတဲ့ ၀ိညာဉ်များ…..
(၁)
သွေးစွန်းသက္ကရာဇ်
ရှစ်ဆယ်ရှစ် ကထဲက
အမာရွတ်ထင်ကျန် နှလုံးသားများ….
နေလောင်တိမ်တိုက်တွေလို
နီရဲရဲ နာကျည်းမျက်နှာများ…..
ခံစားမှုနဲ့ နိုးကြားနေပြီး
သံမဏိလို ခိုင်မာတဲ့ စိတ်ဓာတ်များ….
ခံပြင်းမှုနဲ့ အံကြိတ်လို့
ကျစ်လစ်အောင် ဆုပ်ထားတဲ့
ခင်းဗျားတို့ရဲ့ တော်လှန်လက်သီးများ…
အားလုံးကို….
ကျနော် ဦးညွှတ်ဂုဏ်ပြုတယ်။
(၂)
လ တွေကြာ နှစ်တွေပြောင်းခဲ့ပြီ
ဒါပေမယ့်
ဒီမိုကရေစီ တိုက်ပွဲတုန်းက
ကျဆုံးသူတွေရဲ့သွေးတွေ
အဓိပတိ လမ်းမပေါ်မှာ
မြို့လယ် လမ်းမတွေပေါ်မှာ
ခုထိ ရွှဲရွှဲစိုနေဆဲ…
သွေးညှီနံ့ သင်းသင်းကို
မြစ်လေညှင်းတို့က သက်သေခံနေတယ်။
(၃)
စစ်ခွေးဘီလူး
အာဏာရူးတွေရဲ့ လက်ကိုင်တုတ်
ယုတ်မာသူတို့ရဲ့လူသတ်လက်နက်များ
စက်သေနတ်တွေကြား
စစ်ဖိနပ်တွေကြား
ရက်စက် ရိုင်းစိုင်းမှုတွေရဲ့အောက်မှာ
ကျောင်းသားလူငယ်တွေရဲ့ နှလုံးသွေးစက်တွေ
ပြည်သူတွေရဲ့ အသက်တွေ
ပြီးတော့…မျက်ရည်တွေ
ဒါဟာ…အမိမြေ လွတ်လပ်ဖို့
အမိမြေ ငြိမ်းချမ်းဖို့
ပေးဆပ်ခြင်း သင်္ကေတတွေ ဆိုပေမယ့်
အားလုံးနဲ့ထပ်တူ ကြေကွဲဆို့နင့်စွာ…။
(၄)
တောက်….
သစ္စာဖောက် သဘောက်သားတွေ
လမ်းမှားကိုလိုက် ကမ်းကုန်အောင်မိုက်လို့
ရမ်းကားချင်တိုင်း ရမ်းကား
လူတန်းစား လက်တစ်ဆုပ်စာကို ကိုယ်စားပြု
လူထု အခွင့်အရေးကို လစ်လျူရှု
ပြည်သူ့ ဘဏ္ဍာစား
ပြည်သူကို စော်ကား
နိုင်ငံ့အားကို လက်နက်နဲ့တည်ဆောက်
နိုင်ငံကို နွံအောက်ရောက်အောင်လုပ်
စုတ်ပြတ်တဲ့ အရည်အချင်းတွေနဲ့
မင်းလုပ် အုပ်ချုပ်နေတာ
အံ့ပါရဲ့…အံ့ပါရဲ့ဗျာ.။
(၅)
သေနတ်ကို အားကိုး
အမျိုးမချစ် မျိုးမစစ်
ဆိုးညစ်တဲ့ လုပ်ရပ်တွေနဲ့
သက်မဲ့ ခန္ဓာတွေပေါ်
အာဏာ ထူထောင်လိုသူတွေ…
ဒင်းတို့ကို ဒဏ်ခတ်
အပြစ်ဒဏ် အထပ်ထပ်ချဖို့
တိုက်ပွဲဝင် ၀ိညာဉ်တွေက
တရားစီရင်လိမ့်မယ်
သေမင်းက အဆင်သင့်စောင့်နေလျက်ပဲ။
(၆)
တိုင်းပြည်အိမ်မက်ဆိုးတွေထဲ
ခမ်းခြောက်နေတဲ့ ဒီမိုကရေစီ
မမျှတနိုင်သေးတဲ့ လူ့ဘ၀
မလှပနိုင်တဲ့ ကောင်းကင်
မမြင်ရသေးတဲ့ အာရုဏ်ဦး
မငြိမ်းချမ်းဖူးတဲ့ အမိမြေအတွက်
မပြီးဆုံးသေးတဲ့ တိုက်ပွဲကို
လက်ချင်းယှက် အသက်နှင်းဆက်လို့
ဆက်လက်ချီတက် ဆင်နွှဲကြပါစို့။
သမိုင်းကို သွေးနဲ့ရေး
အသက်တွေ စတေးခဲ့ပေမယ့်
လွတ်လပ်ရေး ကြွေးကြော်သံတွေနဲ့
မသေ သေးတဲ့ ၀ိညာဉ်များ
သူတို့ရဲ့အား…
ညီညွှတ်ခြင်းစွမ်းအား…
အားလုံးနဲ့ အတူတူ
အောင်လံထူမယ့် နေ့သစ်ဆီသို့။
မင်းထက်မိုး (GHRE)
Labels: ကဗျာ
